Денеска во Казан, Татарстан почнува самитот на БРИКС на кој ќе присуствуваат водечките светски лидери, вклучувајќи ги кинескиот претседател Кси Џинпинг, индискиот премиер Нарендра Моди и турскиот претседател Реџеп Таип Ердоган.

Ова е најголемиот меѓународен состанок во Русија откако започна војната во Украина, на кој Кремљ сака да ја демонстрира својата способност да создаде нови сојузи, и покрај западната изолација.

Русија го гледа самитот како важна прилика за унапредување на својата надворешна политика и проширување на групата, а целта е да се создаде алтернатива на западните финансиски и политички структури.

На агендата на самитот ќе се разгледува создавање нов платен систем, што би можело да биде ривал на СВИФТ системот, и ескалацијата на конфликтите на Блискиот Исток. Кремљ исто така ја нагласува важноста на мултиполарниот свет, при што Путин ќе има средби со клучни лидери за да ја зајакне соработката.

Безбедносните мерки во Казан се засилени поради стравувања од напади, особено со оглед на претходните инциденти со украински беспилотни летала во регионот.

Движењето во центарот на градот е ограничено, а жителите се советуваат да останат дома. На самитот ќе присуствува и генералниот секретар на ОН, Антонио Гутереш, што пак е негово прво патување во Русија од почетокот на конфликтот.