Гислејн Максвел, поранешна соработничка на Џефри Епстин и осудена за трговија со луѓе, одби да одговара на прашања за време на сослушување пред Комитетот за надзор на Претставничкиот дом на САД.

Таа се појави виртуелно од затвор во Тексас и повеќепати се повика на Петтиот амандман, со што го искористи правото да молчи.

-Госпоѓо Максвел, дали бевте блиска пријателка и доверлив човек на Џефри Епстин?

-Би сакала да одговорам на вашето прашање, но по совет на адвокатот, со почит одбивам да одговорам на ова прашање и на сите поврзани прашања. Мојата петиција за habeas е во тек во Јужниот округ на Њујорк. Затоа се повикувам на моето право на молчење според Петтиот амандман од Уставот на САД, изјави Максвел.

Претседателот на комитетот, републиканецот Џејмс Комер, изјави дека одбивањето било очекувано, но разочарувачко, додавајќи дека пратениците сакале одговори за злосторствата на Епстин и можните соучесници.

Демократите оценија дека Максвел го искористила настапот за да лобира за помилување од претседателот Доналд Трамп.

Преживеани од злоупотребите на Епстин преку писмо до Конгресот повикаа на скептицизам кон какви било изјави од Максвел, предупредувајќи дека секој посебен третман би бил штетен за жртвите. Белата куќа претходно соопшти дека не се разгледува никаква олеснителна мерка за неа.