Што е подобро или што е полошо, кажаа граѓаните на изборите. Формулата за распределба на пари за проекти на општините стои во нашата програма, а претседателот ја презентираше пред сите граѓани, вели министерката за финансии, Гордана Димитриеска Кочоска во вечерашното интервју во „Вин-Вин“ на ТВ Телма.

„Не можам да пресметам на 100 милиони евра колку ќе биде по глава на жител. Ние правевме пресметки за 250-те милиони, излегуваше некаде, мислам, 137 евра по глава на жител“, рече Димитриеска Кочоска.

Во проектот, нагласи министерката за финансии, ќе биде вклучено и министерството за локална самоуправа и, како што рече, „будно ќе набљудува“. Средствата, додаде Димитриеска Кочоска, се за проектите на општините за оваа година, проекти кои се веќе готови.

„Претпоставувам дека кај поголемите општини се завршени работите и тие ќе можат побрзо да изреагираат и да имаат готови проекти. Која општина има готов проект и е прифатлив, ќе си ги добие средствата. Оние кои што немаат, нема за што да им ги дадеме средствата. Ако нема проект, ќе аплицира наредната година“, појасни Димитриеска Кочоска.