Огромен пожар што избувна во планинската област Малија на Кипар досега уништи околу 10.000 хектари површина, одзеде два човечки живота и предизвика евакуација на стотици лица. Поради високите температури до 44°C и силните ветрови, пожарот брзо се прошири кон населени места, при што две лица беа пронајдени мртви во изгорено возило на патот меѓу Монагри и Аласа. Сомнежот е дека се работи за повозрасен брачен пар пријавен претходно како исчезнат.

Жителите на погодените подрачја остро ја критикуваат неорганизираната реакција на надлежните и отсуството на системот за итни предупредувања, кој сè уште не е во функција. Евакуацијата на 14 села и еден детски камп главно ја организирале самите жители. Пожарникарите, поддржани од 13 авиони и меѓународна помош од Шпанија и Јордан, се борат со огнената стихија, но борбата е отежната поради променливиот правец на ветрот и локалната микроклима.