Европскиот парламент денеска во Стразбур ќе расправа по Предлог-извештајот на европратеникот Томас Вајц, кој ја повторува поддршката за евроинтеграциите на Македонија и ја пофалува досегашната посветеност на реформите.

Извештајот ги истакнува успесите на земјата во процесот на скринингот и посветеноста кон демократските и социо-економските реформи, но и предупредува на одложувањата во пристапниот процес.

Во текстот се наведува дека земјата мора да ги исполни обврските од заклучоците на Советот од 2022 година, особено во однос на уставните измени.

Европратениците повикуваат Европскиот совет да даде јасен и недвосмислен сигнал дека ќе ја поддржи следната фаза од преговорите веднаш по исполнувањето на тие услови.

Контроверзии предизвика поднесениот амандман на членот 3, со кој се предлага бришење на делот за „целосно почитување на македонскиот јазик и идентитет“, како и точката каде се потсетува дека ЕУ го признава македонскиот јазик и идентитет.