Илјадници жители на Хаваи добија наредба да ги напуштат своите домови, откако оваа американска сојузна држава беше погодена од најтешките поплави во последниве децении.

Ова е втора силна бура што го погоди архипелагот во последната недела, предизвикувајќи штета што може да надмине 1 милијарда долари, според градоначалникот на Хонолулу, Рик Бланџиарди.

Повеќе од 230 луѓе досега биле  спасени, изјави Бланџиарди на прес-конференција. Обилните  дождови започнаа во петокот и продолжија со ненамалено темпо.

Властите предупредија дека брана на Оаху, најнаселениот остров во државата, е во ризик од уривање.

Бланџиарди ги повика жителите „да останат безбедни“ и „да ја сфатат бурата максимално сериозно“.

На истата прес-конференција, гувернерот Џош Грин изјави дека нема пријавени жртви и ги пофали службите за итни случаи за нивната работа.

„Ова е најголемата поплава што сме ја имале во Хаваи во последните 20 години“, рече тој. Во некои области паднале повеќе од 25 см дожд, а ветровите достигнале брзина до 160 км на час.

Надојдените води подигнале куќи и автомобили и предизвикале евакуација на околу 5.500 луѓе северно од главниот град Хонолулу. Патишта низ островите се затворени.

Одделот за управување со итни ситуации во Хонолулу издаде повеќе предупредувања за ненадејни поплави и ги повика жителите да се преселат на повисоки места и да избегнуваат поплавени области.

Предупредувања за поплави се издадени и за Мауи, Молокаи и Хаваи.