Осомничениот за предизвикување сообраќајка Васил Јованов продолжува да ја бранува јавноста, и тоа од зад решетки. Откако порталот „Буревесник“ објави фотографии од притворското одделение во истражниот затвор Шутка со мобилен во раце, службите се на нозе.

Од првичната истрага на управата за санкции е дека на Јованов му бил одземен мобилниот при приемот во истражниoт затвор, но дополнително се испитува како тој дошол до уредот следниот ден.

„Точна е информацијата. Извршени се претреси во истражниот затвор Скопје и пронајдени се повеќе мобилни телефони и кај други притвореници. Лицето Васил Иванов е се уште во приемното одделение според процедурата. Останува таму, мобилниот му е одземен, веднаш е покрената истрага за да се утврди кои од вработените дозволиле Иванов и други притвореници да добијат мобилни телефони. Ќе следи најстрога санкција за сите инволвирани затворски службеници“, најави директорот на управата Александар Пандов, за телма Телевизија.

Извршен е претрес во сите ќелии и осомничениот Јованов е преместен во самица. Истрагата е во тек, потврди за Телма директорот на истражниот затвор Бобан Утковски.

Истрага побара и семесјтвото на починатата Фросина Кулакова на социјалните мрежи од министерот за внатрешни работи Панче Тошковски, а одговори од него очекуваат и од опозициската СДСМ.

Оттаму, пишуваат „Ова е скандал кој го зголемува сомнежот дека виновникот е заштитено лице на власта. Кој го штити младиот убиец во врвот на власта? Срамно и недозволиво осомничен за ваков грозоморен чин слободно да користи мобилен телефон уште од првиот ден“, се вели во соопштението на СДСМ.

Извор на фотографија: „Буревесник“