Условниот отпуст на осудениот Митко Чавков му е одобрен зашто ги исполнувал законските услови – соопштија од Основниот кривичен суд Скопје.

Поранешниот министер за внатрешни работи, излезе од затворот во Штип  утринава. Тој првично беше осуден на казна затвор од 18 години за „терористичко загрозување на уставниот поредок и безбедноста“. Но, подоцна на 16-те осудени во овој случај им беше намалена казната од 7 до 16 години. Токму на Чавков му беше изречена највисоката казна од 16 години затвор, поради тоа што тогаш имал „златна команда“ за протестите пред Собранието.

Од Судот информираат дека  Чавков издржал една третина од утврдената затворска казна, имал влошена здравствена состојба а правосилни одлуки за условен отпуст добиле и останатите осудени за кривичниот настан.

„Основниот кривичен суд Скопје преку кривичниот совет на 23.02.2026 година по предлог на директорот на КПД Штип, донесе одлука со која осудениот Митко Чавков условно го отпушти од понатамошно издржување на казната, од причина што истиот ги исполнува законските услови за истото, односно има издржано 1/3 од утврдената затворска казна, заради неговата влошена здравстена состојба, како и поради процесна избалансираност со останатите осудени лица за овој кривичен настан, за кои веќе се донесени правосилни одлуки за условен отпуст, соопштуваат од ОКС Скопје.

Чавков, но и останатите осудени лица за „27 април“ бараат повторно судење, процесот го оценуваат како „политичка монтировка“. Екс министерот за внатрешни работи во текот на издржување на затворската казна се соочуваше со здравствени проблеми и поради тоа казната му беше прекинувана.

Излегол претпладнево околу 10 часот – екс министерот Чавков на условен отпуст од затворот во Штип