Извештајот на Антикорупциската комисија за финансирањето на политичките партии ќе биде доставен утре во Собранието. Над 8 милиони евра пари од буџетот легнале на сметките на партиите за локалните избори. Законите се основниот генератор за незаконско постапување и корупција.

Нотирани се голем број неправилности. Партиите се нетранспарентни во делот на финансиите, забележани се донации од лица кои немаат можност да уплатат толкави суми на пари што го потврдиле и од Управата за финансиско разузнавање. Утврден е и можен поткуп, клиентелизам и купување гласови без да се одговара за тоа.

За изборниот период се формирани 54 предмети. Најголемиот дел се однесуваат на предизборни вработувања, злоупотреба на буџетски средства, поткуп, предвремени кампањи, градежни активности.

Антикорупциска реагира на начинот на кој се менуваше Изборниот законик. Најмногу промени, дури 14 пати, се направени во делот на финансирањето и рекламирањето, а ниту еднаш не е одржана јавна расправа за понудените решенија. Токму поради тоа се бара да се донесе целосно нов Изборен законик со кој ќе се избегнат сите идни можни злоупотреби.

Јулијана Пешевска