Подобар живот за сите и доближување на животниот стандард до европскиот преку издржани и конкретни мерки, најавуваат Социјалдемократите во својата изборна програма, која денеска ја промовираа пред членството. Фокусот им е на четири основни столба: човечки капитал, продуктивност, иновативност и конкурентност. Проектираат просечна стапка на раст на економијата од 5,1 отсто во наредните четири години, просечна плата до 1.100 евра, а минимална плата од 600 евра. На пензионерите им ветуваат минимална пензија од 20.000 денари, како и новогодишна поддршка од 6.000 денари за секој пензионер.

Делови од програмата презентираа и носителите на изборните листи, кои и на овие избори се во парови. Неговата партнерка во првата изборна единица, Миника Зајкова од ЛДП, вети бесплатен оброк за учениците во основните и средните училишта, бесплатен јавен превоз од прво одделение до дипломирањето, бесплатни екскурзии. Носителот во втората изборна единица, Оливер Спасовски најави нула толеранција за корупција и силна борба против криминалот.

Најмногу овации доби носителот во четвртата изборна единица, Венко Филипче.

Останатите носители ветија и двојно зголемен буџет во сточарското производство, данок на луксуз и богатство, ревизија на сите дипломи, како и доближување на институциите до граѓаните преку мобилни канцеларии во руралните средини.

Далиборка Демјанска Цветановска