Министерот за надворешни работи и трговија Тимчо Муцунски оцени дека усвоените измени на Законот за надворешни работи во собранието, се суштински чекор кон професионализација на дипломатијата и подобрување на условите за македонските дипломати во странство.

Според него, по повеќе од една деценија се прават суштински измени кои предвидуваат зголемување на процентот на амбасадори од редот на кариерните дипломати, продолжување на мандатот на упатените дипломати на четири години (наместо досегашните три), како и уредување на процедурата за именување на амбасадори и улогата на Собранието во таа постапка.

Дополнително, воведена е можност за назначување специјален државен претставник во странство, доколку постои посебен интерес за државата, напиша тој во објавата на Фејсбук.