Советот на Народната банка го усвои Кварталниот извештај, според кој макроекономските показатели во земјата се стабилни и во најголем дел се усогласени со октомвриските проекции. Инфлацијата во четвртото тримесечје изнесувала 4,2%, а економската активност умерено забрза, со раст на бруто домашниот производ од 3,8%, се вели во соопштението на банката.

Од НБРМ додаваат дека банкарскиот сектор продолжува со солидна поддршка за економијата, со раст на кредитите од 13% и на депозитите од 10%, додека девизните резерви достигнале 4,92 милијарди евра, обезбедувајќи стабилност на домашната валута.

Народната банка, исто така, ја унапреди оперативната монетарна рамка за подобро управување со ликвидноста и поефикасно пренесување на монетарните сигнали. На среден рок се очекува инфлацијата да се забави и економскиот раст да продолжи да се засилува, со предвидени 4% за 2026 година.