Зајакнувањето на активностите на теренот ќе биде главниот приоритет на македонското претседавање со ОБСЕ, најголемата регионална организација за безбедност и соработка, која опфаќа 57 држави учеснички од Европа, Средна Азија и Северна Америка. Шефот на дипломатијата  Бујар Османи, кој е и новиот претседавач на ОБСЕ во 2023, го акцентираше капацитетот на ОБСЕ за ублажување на кризата и поддршка на мирот, велејќи дека Украина ќе остане главен приоритет и клучно безбедносно прашање.

За претседателствувањето со оваа организација Министерството за надворешни работи ќе потроши околу 100.000 евра за пиар активности за што склучен е договор со Друштвото за менаџмент и консултантски активности. Според министерот Османи министерството не располага со таков кадар.