Поранешниот албански претседател и актуелен лидер на опозициската Партија на слободата, Илир Мета, денеска се појави пред Специјалниот суд, но првото рочиште беше одложено за попладне поради жестоки расправии во судницата.

Мета, кој е обвинет за перење пари, пасивна корупција и непријавување имот, изрази огорченост и обвини дека е уапсен по наредба на “нарко државата”.

Тој се расправаше со обвинителите, вклучувајќи го и Алтин Думани, шефот на Специјалното обвинителство против организиран криминал и корупција.

Неговите адвокати побараа дополнително време за запознавање со обвинението.

Мета и неговите соучесници ја негираат вината, тврдејќи дека станува збор за политички мотивиран процес.

Ако биде осуден, Мета се соочува со максимална казна затвор од 15 години.

Тој беше уапсен во Тирана по враќањето од Косово, а на судењето присуствуваа и неговата сопруга, како и други поддржувачи.

Случајот привлекува големо внимание во Албанија, со оглед на политичките контексти и обвиненијата за корупција.