Американската актерка и оскаровка, Гвинет Палтроу се изјасни оти не е виновна за скијачката незгода во Јута во 2016 година, во која маж доби скршеници на неколку ребра и потрес на мозок.

Педесетгодишната Палтроу на сослушувањето рече дека скијала со нејзините две деца, кога во неа удрил 76-годишниот офталмолог Тери Сандерсон кој е тужител во процесот.

„Додека скијав, две скии ми дојдоа меѓу моите и ми ги раздвои нозете. Потоа се прилепи и тело до моето, ме притисна и слушнав многу чуден звук на стенкање. Се обидував да разберам што се случува. Помислив „Дали сум јас?“, „Дали е ова некоја шега? – Како некој да прави нешто изопачено. Тоа навистина беше многу чудно. Умот ми работеше многу брзо и се обидував да утврдам што се случува“, рече Палтроу.

Сандерсон, пак, рече дека од ударот претрпел „трајна трауматска повреда на мозокот“. Тој бара отштета од 300.000 долари, иако првобитно бараше 3,1 милиони долари.

Тужба покрена и Палтроу во која бара симболична отштета од еден долар и другата страна да ги плати судските трошоци.