Пет лица загинаа, а две се повредени во експлозија и пожар што денеска се случија во објект на јужнокорејската одбранбена компанија „Ханва Аероспејс“ во градот Деџон, соопштија локалните власти. Според службеникот за вонредни ситуации Јун Сеонг-су, пожарот избувнал во 10:59 часот по локално време, по експлозија во објектот лоциран во округот Јусеонг.

Локалната медицинска службеничка Ким Џу-јонг соопшти дека досега се регистрирани седум жртви, од кои петмина починале, едно лице е тешко повредено, а едно има полесни повреди.

Властите соопштија дека причините за експлозијата засега не се познати и дека е во тек истрага за утврдување на околностите под кои дошло до несреќата. Според Јун, станува збор за објект со посебен безбедносен статус, определен од владата на Јужна Кореја. Во меѓувреме, надлежните служби сè уште работат на идентификација на загинатите.

Новинската агенција Јонхап јавува дека локацијата е еден од клучните производствени и развојни капацитети на „Ханва Аероспејс“, каде се развиваат погонски горива и ракетни системи. На местото на несреќата беа ангажирани бројни противпожарни и спасувачки екипи, како и хеликоптери за итна интервенција.