Илјадници демонстранти денеска го парализираа сообраќајот во Париз, Марсеј и други француски градови, како дел од движењето „Bloquons Tout“ („Блокирај сè“), кое повика на масовни блокади, штрајкови и протести по падот на владата на Франсоа Бајру.

Француските власти се во состојба на висока готовност, стравувајќи од можни саботажи и насилни инциденти низ земјата.

Протестите доаѓаат во момент кога Франција влегува во нова политичка криза – со четврти премиер во само една година.

Претседателот Емануел Макрон го назначи Себастиен Лекорњу, досегашен министер за одбрана, за нов премиер доцна во вторникот, само два дена по соборувањето на Бајру во парламентарното гласање недоверба.

Протестното движење, кое доби поддршка преку социјалните мрежи и енкриптирани канали, го обвинува Макрон за политичка нестабилност и го наведува како една од главните цели на отпорот.