Четири хуманоидни роботи-монаси продефилираа низ улиците на центарот на Сеул во рамки на традиционалната парада пред претстојниот роденден на Буда во Јужна Кореја.

Роботот Габи ја предводеше поворката заедно со уште три роботи со будистички имиња – „Сеокга“, „Мохи“ и „Ниса“.

По нив следуваа околу 50.000 учесници кои носеа повеќе од 100.000 рачно изработени фенери во различни бои, создавајќи впечатлива атмосфера низ улиците на главниот град.

Настанот е дел од традиционалните прослави што се одржуваат секоја година пред одбележувањето на роденденот на Буда на 24 мај.

Организаторите велат дека роботите ќе имаат улога на почесни монаси за време на прославите.

Според локалните медиуми, вклучувањето на хуманоидни роботи претставува обид древната будистичка традиција да се доближи до помладите генерации и да остане релевантна во современиот свет.