Северна Кореја порача дека Соединетите Американски Држави мора да прифатат дека условите од времето на претходните самити се променети и дека ниту еден иден дијалог нема да ја заврши нејзината нуклеарна програма.

Ким Јо-џонг, сестрата на севернокорејскиот лидер Ким Џонг-ун, изјави дека „личната поврзаност меѓу Ким и Доналд Трамп не е лоша“, но ако Вашингтон се надева дека таа ќе доведе до разоружување, тоа ќе биде „предмет на потсмев“.

Ким нагласи дека Северна Кореја денеска има стабилни нуклеарни капацитети и поинаква геополитичка позиција, што значи дека времето на самитите како оној во Сингапур (2018) и Ханој (2019) се минато.

„Обидите да се негира нуклеарниот статус на нашата држава ќе бидат категорично отфрлени“, додаде таа.

Одговорот од Белата куќа гласи дека претседателот Трамп останува посветен на својата цел – целосна денуклеаризација на Корејскиот Полуостров – и е отворен за дијалог со Ким Џонг-ун.

„Целите остануваат непроменети“, изјави претставник на администрацијата, потсетувајќи дека на првиот самит беше постигнат принципиелен договор за безнуклеарен полуостров, иако подоцнежните преговори не донесоа конкретен напредок.