Хаос на аеродромите предизвика имплементацијата на Шенген системот за влез и излез, кој започна на 12 октомври 2025 година, посебно во периодот на зголемени гужви. Патниците чекаат и по три часа за да ги поминат сите процедури. Аеродромските служби предупредуваат дека доколку системот не се стабилизира до почетокот на јануари, многу тешко ќе биде да се реализира обврската за зголемувањето на прагот за регистрација на 35% од 9 јануари, хаосот на аеродромите ќе биде уште поголем, а довербата на патниците драстично ќе се намали.

Сегашниот праг на регистрација на патниците е 10%.

Европскиот оддел на Меѓународниот совет на аеродроми (ACI) ги повика Европската комисија, eu-LISA, Фронтекс и земјите-членки на Шенген итно да се справат со растечките оперативни проблеми со имплементацијата на Шенген системот за влез и излез (EES) или да ја обезбеди поголема флексибилност при неговата примена до целосното воведување на сите аеродроми.

Оттаму велат дека, прогресивното зголемување на регистрацијата и снимањето на биометриски податоци од државјани на трети земји кои влегуваат во Шенген зоната резултира со зголемување на времето за обработка на граничната контрола на аеродромите до 70%, со време на чекање до три часа во периодите на најголем сообраќај.