Претседателката Гордана Сиљановска-Давкова денеска во Кабинетот на претседателот ги додели наградите и признанијата „Women in Tech® Macedonia Awards“, настан организиран од Women in Tech® Македонија во соработка со Министерството за дигитална трансформација.

Добитнички на главните награди се Кристина Мукаетова за најперспективна тинејџерка, Маја Наумовска Савеска за најголем поддржувач, Биљана Пејоска Ристеска за највлијателна иницијатива, Моника Симјановска Мишева за најреволуционерна улога во технологија, Франка Граждани за жена во Web3, Ина Најдановиќ Марковиќ за стартап, Гордана Клинчарова за технолошка дипломатија, Елка Јошевска за глобално лидерство и Софче Јовановска за животно достигнување во технологијата.

Признанија во 21 категорија добија Бојана Трајковска за најперспективна жена лидер во технологијата на годината, Моника Јошевска за жена лидер на годината, Маја Виденовиќ за извонредност во STEM, проф. д-р Владимир Трајковиќ за техничка извонредност, Ивана Каралиева Петреска за продукт лидерство, Емилија Ѓорѓевска за извонредност во вештачка интелигенција и податоци, Мартина Димоска за пионер во идни технологии, заменик-министерката за европски прашања Викторија Трајков за лидер во дигитална трансформација, Сања Митровска за иновација во развој на продукти, проф. д-р Весна Димитрова за извонредност во сајбер безбедност, Весна Иваноска за највисоко достигнување во секторот за едукација во технологија, Никола Велковски за експоненцијален раст, Елизабета Јовановска за стартап за општествен импакт, Александра Митревска за млад претприемач во технологија, Елена Петревска за бизнис лидер во технологија, Елена Иванова за двигател на екосистемот, Анка Трајковска Петкоска за едукатор во технологијата на годината, Наташа Велковска за креатор на содржини во технологија, Startup Revolution AI за најдобра техничка иницијатива за импакт, Нина Ангеловска Станков за регионален импакт и Верица Јорданова за медиумско влијание за жени во технологија.

Во своето обраќање, Сиљановска-Давкова истакна дека денес, повеќе од еден век по Вирџинија Вулф и нејзината идеја за „сопствена соба“, пред жените се отвора нов простор – дигиталната соба, во која се создава архитектурата на современиот свет.

Таа посочи дека повеќе од половина од истражувачката заедница во државата ја сочинуваат жени, што претставува значителен интелектуален потенцијал за развој на науката, иновациите и технологијата.

„Не е доволно жените само да бидат дел од технолошкиот развој, туку рамноправно да учествуваат во дефинирањето на правилата и вредностите на дигиталниот свет“, порача претседателката.

Сиљановска-Давкова нагласи и дека иднината нема да бара само технолошка прецизност, туку и емоционална интелигенција, оценувајќи дека жените успешно ги поврзуваат аналитичноста, грижата и лидерството.

„Кога една жена ќе успее, нејзиниот успех станува можност и охрабрување за многу други жени коишто доаѓаат по неа“, рече претседателката.