Царински службеници на граничен премин Богородица спречија обид за криумчарење на сребрен накит во вредност од 430.880 денари. Сребрениот накит е запленет, а до едно лице е поднесена кривична пријава до ОЈО Гевгелија за сторено кривично дело криумчарење.

„Осомничениот во вечерните часови пред полноќ, на влез на граничниот премин се пријавил со туѓ автомобил за што имал одобрение за управување. Поради сомневање селектиран е за детална контрола, при што во фабричките празнини зад предните бришачи, како и во фабричката празнина зад фиоката пред совозачкото седиште пронајдени се 387 парчиња нараквици, 134 пара обетки и 759 ланчиња. Случајот е предаден во Одделението за истраги при Секторот за контрола и истраги од каде е поднесена кривична пријава“, се вели во соопштението на Царинската управа.

• Царински службеници на граничен премин Дојран спречија обид за нелегален внес на девизи, при што запленети се 9.250 евра. Имено при контрола на автомобил со странски регистарски таблички управуван од грчки државјанин царинските службеници пронашле 19.250 евра, при што согласно Законот за девизно работење му се вратени 10 илјади евра, а останатите се запленети.

Според извештајот на македонските цериници, на граничниот премин Табановце во изминатиот период биле спречени обиди за криумчарење злато, лаптопи, како и друга вредна стока.

„Странска државјанка се обидела со изнајмен автомобил во кој патувала како сопатник да шверцува златен накит вреден 600 илјади денари. Во обидот е спречена од царинските службеници, кои при контрола на автомобилот во чантата во нејзина сопственост пронајдоа разновиден златен накит со тежина од 200 грама. Станува збор за една круна, ланче со три монети, ланче со седум монети, две ланчиња со пет монети, ланче со единаесет монети и две нараквици. Против неа е поднесена кривична пријава“, се вели во соопштението на Царинската управа.

Покрај ова Царинската служба за мобилен скенер на влез во државата на граничен премин Табановце, запленила 284 парчиња облека, пронајдени при контрола на камион со бугарски регистарски таблички.

• Во друг случај на царинска испостава Табановце мобилен царински тим заплени и 1.500 пара чорапи со потписот на „Најк“ откако истите ги пронајде при контрола на камион пријавен за транзит. При контрола на камионот е утврдено дека покрај останатата стока која била уредно декларирана има и стока која воопшто не била опфатена со царинските документи.

Во исто време фатен е струмичанец кој се обидел да криумчари во државата шест употребувани велосипеди, 13 употребувани лаптопи, два компјутери за мотор и 30 крстачи за кардан. Во обидот е спречен од мобилен царински тим кој при контрола на комбето со кое управувал ја откри непријавената стока. Имено на прашање на царински инспектор дали има нешто да пријави лицето одговорило дека има скара, скала, агрегат, прскалка, при што поради сомневање е селектиран за контрола и во четири вреќи и патни торби се пронајдени непријавените производи.

„Скопјанец се обидел преку граничен премин Табановце во државата да шверцува 180 парчиња различни шминки, над 40 парчиња женски шорцеви, како и разна друга стока. Во намерата го открија царинските службеници кои поради сомневање го селектираа за детална контрола при што во патничкото комбе со кое управувал се пронајдени непријавените производи за кои требал да плати давачки“, соопштуваат од Царинската управа.