Српскиот министер за внатрешни работи Ивица Дачиќ е во сериозна состојба и се бори за живот поради пневмонија на двете белодробни крила поради што е згрижен во Клиничкиот центар во Белград.

-Тој моментално е на механичка вентилација – вентилатор, добива сè што му е потребно, сите лекови, терапија, со тој вентилатор, што е метод на лекување, купуваме време потребно тие лекови да дејствуваат и се бориме за неговиот живот. Тешка пневмонија и борба за неговиот живот“, изјави помошник-директорот на Клиниката за пулмологија, Спасоје Попевиќ.

Дачиќ е хоспитализиран денеска откако состојбата му се влошила дополнително. Веднаш е ставен на респиратор за да му се олеани дишењето.

Дачиќ кој е претседател на помалата владеачка партија во Србија, СПС, е на 60-годишна возраст и со години има здравствени проблеми ао дијабетес.

Вечерва во болница го посети и српскиот претседател Александар Вучиќ со министри од владата.

-Тој е во тешка ситуација, но веруваме во лекарите и веруваме во него и се молиме за него, изјави Вучиќ по посетата.

Ивица Дачиќ во 2006-та година го презеде лидерството на СПС (партијата раководена од Слободан Милошевиќ во 1990-тите години) кога партијата имаше слаб рејтинг. Член е на таа партија од 1991-ва и беше партиски портпарол и одговорен за односи со јавност во времето на режимот на Милошевиќ.

Откако е партиски претседател, за две децении ги извршуваше важните функции во Србија во повеќе мандати и влади со различен партиски состав. Беше и премиер и претседател на српскиот парламент, како и министер за внатрешни и надворешни работи.

Роден е во Призрен, а на 6-месечна возраст семејството Дачиќ се преселило во селото Житораѓа во Србија. Дипломирал новинарство во Белград со највисоки оценки.

Меѓу последните прес конференции на Дачиќ е онаа во селото Коњух кај Крушевац по откривањето на складот со 5 тона марихуана, за која се утврди дека е од Македонија.

Познато е и дека воениот рок во ЈНА го служел во Македонија односно во Куманово.