Сојузот на синдикатите на Македонија предупредува дека функционерите би можеле да си ги зголемат платите за просечно 250 евра, додека платите на работниците би се зголемиле за само 25 евра, по објавата на Државниот завод за статистика за раст на просечната плата од 9,6% во 2025 година.

Претседателот на ССМ, Слободан Трендафилов наведува три можни сценарија: функционерите да ја зголемат минималната плата и останатите плати за 9,6%, да го намалат коефициентот за да го избегнат зголемувањето, или да ја сменат основицата за пресметка на платите и да ги намалат коефициентите за 40%.

Според него сите три сценарија го фаворизираат функционерскиот интерес, додека работниците добиваат значително помал ефект.

Во среда пред пратениците ќе се најдат коригираните коефициенти за функционерските плати, кои треба да го ограничат нивното зголемување.

Владата претходно потврди дека ќе се направи редовно усогласување на платите според законските прописи и усвоениот стандард.