Американскиот државен секретар, Марко Рубио, изјави дека целите на САД во Иран може да се постигнат без копнени трупи, иако тие веќе се на пат кон Блискиот Исток.

Нагласувајќи дека „нема да разговара за воени тактики“, Рубио истакна дека повеќето цели на САД во Иран се реализираат со побрзо темпо од предвиденото, додавајќи: „Можеме да ги завршиме без какви било копнени сили.“

Шефот на американската дипломатија изјави дека распоредувањето на трупите е со цел да му овозможи на Трамп „максимална флексибилност и можност да се прилагоди на потенцијалните ситуации доколку се појават.“

Според Рубио,  воените напади на САД се движат со брзо темпо и може да бидат остварени во наредните неколку недели.

Илјадници американски војници се на пат кон регионот, вклучително и најмалку 1.000 припадници на 82-та воздушно-десантна дивизија.

Рубио исто така изјави дека обезбедувањето на Ормутскиот теснец да остане отворен за бродски сообраќај најверојатно ќе претставува „итен предизвик“ дури и откако САД ќе ги постигнат своите воени цели во Иран.

Одговарајќи на новинарските прашања, по состанокот на Г7 во Франција, Рубио рече дека Иран може да се обиде да воведе такса за премин низ теснецот — потег што, според него, може да предизвика значителна економска штета за многу земји ширум светот.

„Не само што ова е нелегално, туку е и неприфатливо. Опасно е за светот,“ рече Рубио за можноста Иран да се обиде да го ограничи сообраќајот низ теснецот.