Американскиот претседател Доналд Трамп го исполни ветувањето дека ќе воведе царини од 25 отсто на увоз на челик и алуминиум, засилувајќи ја долго ветената трговска војна и покрај предупредувањата од Европа и Кина.

„Денеска ги поедноставувам нашите царини за челик и алуминиум“, рече Трамп во Овалната соба додека ги потпишуваше извршните наредби „Тоа е 25 проценти без исклучоци“.

Трамп, исто така, сигнализираше дека ќе разгледа воведување дополнителни тарифи за автомобили, лекови и компјутерски чипови. Оваа одлука е дел од неговата стратегија за зајакнување на економијата и промовирање на домашното производство на челик и алуминиум, но предизвика реакции од многу земји кои ги сметаат таквите мерки за прекршување на трговските договори.

Европа и Кина веќе изразија загриженост и се подготвени да преземат контрамерки во одговор на американските тарифи. Американските тарифи за увоз на челик и алуминиум ќе стапат на сила од 12 март.