Украинскиот претседател, Володимир Зеленски, изјави дека неговата држава била погодена од досега најмасовниот воздушен напад од Русија – 728 дронови и 13 крстосувачки или балистички проектили погодиле градови ширум државата во повеќе бранови.

Зеленски го осуди нападот, додавајќи: „Ова се случува во момент кога спроведуваме многу напори да постигнеме мир и прекин на огнот а Русија продолжува постојано ги отфрла“.

Нападите во текот на минатата ноќ се случија откако Претседателот Доналд Трамп изјави дека САД ќе испратат оружје за властите во Киев, промена на минатонеделната суспензија на помошта за Украина, за која американските медиуми тврдат дека Трамп не бил информиран.

Иако во минатото често пати потенцираше колку има добар однос со шефот на руската држава, Трамп сега не бираше зборови да опише колку е незадоволен од неговото однесување.

„Сакаме да испратиме оружје за одбрана затоа што Путин не ги третира човечките суштества на правилен начин, убива премногу луѓе. Затоа ќе испратиме некои одбранбени оружја за Украина и јас го одобрив тоа. И како да ви кажам:Путин ни кажува многу с..ње! Ако баш сакате да знаете… Тој беше многу фин цело време, но сега излезе дека сето тоа било бесмислено“ – изјави американскиот претседател Доналд Трамп.