Италијанските власти уапсија девет луѓе поврзани со три добротворни организации под сомнение дека собрале милиони евра средства за палестинската милитантна група Хамас, соопштија денеска обвинителите за антитероризам.

Осомничените се обвинети дека испратиле околу седум милиони евра до здруженија со седиште во Газа, на палестинските територии или во Израел, кои се во сопственост, контролирани или поврзани со Хамас.

Меѓу уапсените е претседателот на палестинското здружение во италија, соопштија обвинителите, опишувајќи го како шеф на италијанската ќелија на организацијата Хамас.

Според италијанските обвинители, кои во истрагата соработувале со други земји од ЕУ, нелегалните средства биле доставени преку банкарски трансфери или преку организации со седиште во странство до здруженија со седиште во Газа, кои Израел ги прогласи за нелегални поради нивните врски со Хамас.