Украина ја започна својата најголема офанзива со беспилотни летала врз Москва во последните две години, објави Си-ен-ен повикувајќи се на руската државна новинска агенција ТАСС.

Во нападот оштетена е клучната рафинерија за нафта и предизвикан е пожар.

Градоначалникот на Москва Сергеј Собјанин рече дека противвоздушната одбрана соборила најмалку 194 беспилотни летала што се упатиле кон руската престолнина во текот на ноќта што е многу повеќе од претходно кога беспилотните летала беа двоцифрени.

Летовите на сите главни московски аеродроми се привремено суспендирани.

Киев ги интензивира нападите врз руската енергетска инфраструктура во напади со долг дострел во последните недели, за што украинскиот претседател Володимир Зеленски рече дека е клучна стратегија за принудување на Москва да ја заврши војната.