Во периодот од април до јуни 2025 година се впишани вкупно 2.876 хипотеки врз недвижности со вкупна вредност од 551,5 милиони евра и 8,3 милијарди денари, покажува Извештајот за работата на Агенцијата за катастар на недвижности за вториот квартал.

Од нив, 1.522 хипотеки се запишани во Центарот за катастар на недвижности во Скопје, а 1.354 во останатите 29 одделенија низ државата.

Во споредба со првиот квартал, бројот на впишани хипотеки е зголемен за 280, што укажува на континуиран раст на хипотекарната активност.

Според податоците на Агенцијата за катастар на недвижности, бројот на впишани хипотеки врз недвижности бележи постојан раст во последните години.

Минатата година биле запишани 8.748 хипотеки во вредност од над 1,7 милијарди евра, додека во 2023 година биле регистрирани 7.844.

Паралелно, во третиот квартал од годинава во Регистарот на цени и закупнини се внесени 6.135 купопродажби на недвижности, што е за 580 повеќе од претходниот квартал.