Претседателот на Европскиот совет Шарл Мишел ја повика Белорусија да не учествува во рускиот воен напад врз Украина.

Имате избор да не ги следите руските деструктивни чекори, имате избор да не учествувате во оваа непотребна трагедија против вашиот сосед Украина, порача Мишел од седиштето на НАТО во Брисел.

Белорусија, најблискиот сојузник на Русија во Европа, дозволи преку нејзината територија десетици илјади руски војници да навлезат во Украина, обвини претходно Киев.

Белорускиот претседател, Александар Лукашенко, изјави дека бил информиран од Путин за руската операција во Украина, но тврди дека белоруската армија не учествува во таа операција.

Во меѓувреме, европските лидери се подготвуваат да одржат вонреден самит на кој ќе дискутираат за воведување нови санкции против Москва поради нејзината инвазија на Украина.