Тетовската територијалната противпожарна единица има помалку пожарникари од законски предвидениот број. Со оглед на тоа дека покрај Тетово, вработените опслужуваат и 5 рурални општини, потребно е вработување на нови, млади лица. Периодов имаат поголем број интервенции во гаснење пожари, особено на отворен простор, помагаат во сообраќајни несреќи, а за време на траењето на пандемијата тие беа ангажирани во активностите за дезинфекција на јавните површини. Отварање на помали противпожарни станици во околните места остана само ветување.

Територијалната противпожарна единица има потреба и од нова помодерна опрема. Возилата се стари во просек 30-тина години, а им требаат и  неколку помали возила за поефикасни интервенции во населбите со тесни улички, а особено за планинските села.

Најверојатно тетовските пожарникари ќе почекаат за исполнување на нивните потреби. Во време на пандемија биле снабдени само со апарати и средства за дезинфекција. Нови вработувања, пак, се во план, велат од Канцеларија за комуникации и односи со јавност при општина Тетово, но според нив, истите треба да бидат најпрво предложени на Совет.

Данијела Билбилоска