Поранешниот министер за економија и актуелен функционер на ДУИ, Крешник Бектеши, изрази загриженост за одлуките на Уставниот суд, особено во контекст на укинувањето на „балансерот“.

Според него, овие одлуки можат да предизвикаат зголемени тензии во меѓуетничките односи во Македонија.

Бектеши, во неделното интервју за Радио Слободна Европа, нагласи дека се одржуваат состаноци во сите ограноци на ДУИ за да се разгледаат можните реакции на актуелните политички настани, вклучувајќи можноста за протести.

Тој не сакаше да го коментира образложението на претседателот на Уставниот суд, Дарко Костадиновски, но истакна дека тој е назначен од поранешниот претседател Ѓорге Иванов и смета дека неговите одлуки негативно влијаат на мултиетничката стабилност.

„Уставните судии треба да внимаваат кога носат сензитивни одлуки, бидејќи тие не само што можат да ја вратат државата назад пред Охридскиот рамковен договор, туку и да создадат нови тензии“, изјави Бектеши.

На прашањето за можните протести, тој смета дека актуелната Влада секојдневно создава скандали кои заслужуваат реакција од граѓаните.

„Секој ден треба да се организира протест, не само од ДУИ, туку од сите граѓани“, нагласи Бектеши.

Во контекст на предлогот за нов закон за правична застапеност, тој истакна дека ДУИ би поддржала решение кое ќе обезбеди рамноправна застапеност на сите етнички заедници.

Смета дека е потребно да се создаде механизам кој ќе гарантира дека сите заедници ќе бидат правилно претставени во државните институции.

Тој, исто така, се спротивстави на укинувањето на одредбите од Законот за примена на јазиците, нагласувајќи дека ДУИ ќе се бори за заштита на правата на сите заедници во земјата.

Бектеши повтори дека на државата ѝ е потребен дијалог и разговори, а не дестабилизација, за да се постигне баланс и стабилност во општеството.