Граѓаните од вчера со соочија со новиот ценовен шок откако Владата не ги продолжи превентивните мерки со кои беа ограничени маржите и ДДВ-то а цените на некои основни продукти веднаш беа покачени.

Кризата која ја предизвика војната во Украина како и пандемијата на Ковид -19 предизвика ценовен шок во целиот свет и најмногу се одразува на цената на струјата, горивата и гасот.

И во регионот се бележи зголемување на цените оосвен во случаи каде што на сила се превентивни мерки и тие се замрзнати.

Ако се спредат цените на основните продукти во Македонија со Босна и Херцеговина и Србија може да се забележи дека имаме речиси најскапо масло за јадење и најефтино гориво.

Но мора да се напомене дека според статистичките податоци, просечната плата во месец март во Босна и Херцеговина е 558 евра а во Србија 636 додека во Македонија е 505 евра, што значи дека граѓаните во старт се посиромашни за 50 односно 130 евра споредено со двете држави.

Цената на лебот во Македонија се движи меѓу 35 и 45 денари, во Србија е речиси 10 денари пониска а во Босна и Херцеговина варира. Месото е на ранг со Србија додека во Босна и Херцеговина е далеку повисоко, а маслото за јадење кое сега се продава за 155 денари за еден литар е далеку поскапо од Србија каде е до 120 денари и за нијанса поевтино од Босна и Херцеговина. Во Македонија килограм брашно се продава најскапо – 58 денари а најефтино е во Србија каде максималната цена достигнува 42 денари. Цените на млекото се речиси исти и се движат околу 60 денари додека во Македонија цената на литар дизел гориво е најниска во регионот.

Сепак мора да се нагласи  дека цените на месото, брашното и маслото за јадење во Србија се замрзнати на нивото од 15 ноември минатата година

Завчера Владата одлучи да го врати ДДВ за основните производи  на 5 отсто, но  и повисоките маржи за трговците.  ДДВ от за горивата  повторно е 18 отсто , а нема повеќе ниту пониска акциза.  Овие мерки беа донесе во март  како превенција од поскапување,  но нивната важност истече, а од Владата со кусо соопштенија најавија дека ќе има таргетирани мерки без да прецизираат што тоа значи.

Огнен Чанчаревиќ