Делегација што ги претставува земјите-членки на Советот за безбедност на Обединетите нации пристигна во египетскиот град Ал-Ариш и ќе се упати кон преминот Рафа кон Појасот Газа, соопшти египетското Министерство за надворешни работи.

Делегацијата ќе биде информирана за операциите за испорака на помош и за пречките што ги наметнува Израел за влез на камиони со помош и евакуација на повредени Палестинци преку преминот Рафа, се вели во соопштението на Министерството.

Посетата доаѓа во време кога „Советот за безбедност, за жал, не може да донесе одлука за прекин на огнот во Појасот Газа и да стави крај на континуираното таргетирање на цивилите, да им обезбеди заштита и да ги обезбеди нивните основни потреби“ се додава во текстот.

Претставник на египетската Црвена полумесечина (ЕРЦ) за ДПА изјави дека делегацијата го посетила складот на ЕРЦ во Северен Синај, кој содржи хуманитарна и медицинска помош што треба да се достави во Газа.

Тие, исто така, ја посетиле болницата Ал-Ариш каде се згрижени некои повредени Палестинци.

Делегацијата се состои од претставници од земјите-членки на Советот за безбедност, вклучувајќи ги Русија, Кина, Бразил, Кореја, Гана, Јапонија и Обединетите Арапски Емирати, додаде тој.