Египет добил 63.000 тони пченица од Франција, објави Ал Ахрам. За пристигнувањето на товарот информираше управата на пристаништето Сафага, кое се наоѓа на педесетина километри јужно од одморалиштето Хургада на Црвеното Море.

Северноафриканската земја, најголемиот увозник на жито во светот, е тешко погодена од руската војна во Украина. Околу 80 отсто од увезената пченица минатата година беше купена од двете страни во конфликтот. Египет увезува меѓу 12 и 13 милиони тони годишно.

Се очекува новата локална реколта да достигне шест милиони тони, што е за 2,5 милиони тони повеќе од приносот во 2021 година. Моментално достапните залихи на пченица ќе ја задоволат потрошувачката до јануари 2023 година, најави претходно министерот за снабдување и домашна трговија Али Али Меселхи.

Кон крајот на мај, Каиро побара заем од 500 милиони американски долари од Светската банка за купување пченица преку Програмата за поддршка за итна безбедност и отпорност на храна.