Есенската потрошувачка кошничка со целосна листа на производи кои треба да бидат со намалени цени или со ограничени маржи сè уште не е објавена. На денешната владина седница, Министерството за економија треба да го достави предлогот и тој ќе се разгледува, но речиси е сигурно дека конечна одлука денеска нема да има. Во меѓувреме, министерот за економија се сретнал и со претставници на стопанските комори и со трговците и со производителите, но нема детали дали и што е договорено. Додека надлежните да донесат одлука, граѓаните се борат со скапотија.

Кои производи ќе бидат во есенската кошница првично требаше да се знае во петок, а потоа се одложи за понеделник. Листата и денес не е објавена. Се знае само дека станува збор за сто производи кои најмногу се користат во есенскиот период и според најавите или треба да им се намали маржата или да им се замрзнат цените. Мерката, според најавите, треба да трае еден месец, а дали ќе продолжи да се применува, дополнително ќе се одлучува.

Неизвесно е и што ќе се случува со Законот за нефер трговски практики кој треба да стапи на сила за 10-тина дена и се очекува да стави крај на проблемите со цените. Од бизнисот се со различен став за законот. Од северозападната комора и од ССК сметаат дека треба да почне примената.

Дел од бизнисмените пак сметаат дека ограничување на маржите и замрзнување на цените не е решение.

Тамара Марковска