Неколку големи пожари избувнаа на различни делови на Грција, зафаќајќи рурални и шумски предели на островот Евија, регионот Месинија на Пелопонез, островот Китера и околината на Солун. Противпожарните служби се борат со интензивни пламени јазици на повеќе фронтови, додека екстремните временски услови дополнително ги отежнуваат напорите за нивно гаснење.

Најкритична состојба е забележана во селото Писонас, во подножјето на планинскиот венец Дирфи, североисточно од Халкида кој е главен град на Евија. Пожарот таму се шири неконтролирано, а издаден е аларм преку бројот 112, со кој жителите се повикуваат на итна евакуација кон населбата Афрати. Густ чад, високи температури и силни, променливи ветрови ја отежнуваат интервенцијата, при што дел од противпожарните возила се опфатени од огнот, а воздушните сили се соочуваат со слаба видливост. Значителни штети се пријавени и на фармерските објекти во областа.

Во гаснењето на пожарот учествуваат 60 пожарникари, меѓу кои и два специјализирани тима од 20-та единица за шумски интервенции (EMODE), како и 18 противпожарни возила, еден хеликоптер и два авиони. Поддршка даваат и волонтери, општински цистерни и тешка механизација.

Во регионот Месинија, пожарот кај Политеја предизвика издавање на три аларми, а беа евакуирани селата Крионери и Селас. Оштетени се две магацински згради. На терен се ангажирани 84 пожарникари, вклучувајќи две копнени екипи од 9-та и 18-та ЕМОДЕ, 30 возила, седум авиони и два хеликоптери, со логистичка поддршка од локалните власти.

На островот Китера, пожарот се прошири низ рурални и пошумени предели, при што беа евакуирани селата Аронијадика, Пицинадес и Араиои. Против огнената стихија се борат 28 пожарникари, засилени со тим од 9-та ЕМОДЕ, шест возила, еден хеликоптер и два авиони, заедно со волонтери.

Во меѓувреме, шумски пожар избувна и во областа Аретуса, во општина Волви, близу Солун. Пожарот се шири низ агрошумски терен, а на терен се испратени 65 пожарникари, две копнени екипи од 2-та ЕМОДЕ, 23 возила, два хеликоптери и три авиони. Помош дава и општинска механизација.