Од хумана гледна точка, девастирачката состојба во Газа е поалармантна, иако е очигледно дека либералниот свет остана хендикепиран, нем и заробен во политиките кои што полека, но сигурно се на карта на потоп на таа либерална идеја, особено заради тоа што сите оние вредности за кои што се залагаа западноевропските држава, па дури и трансатлантската агенда, таму се погазени, а лидерите, во најголем дел, се на страната на Израел, вели проф. д-р Методи Хаџи-Јанев, воено-политички аналитичар, во вечерашната „Топ тема“ на ТВ Телма.

„Сето тоа создава сериозен проблем, на другата страна, онаму каде што всушност Европа бара решение, а тоа е проблемот со Украина и кој ќе биде излезниот резултат од Украина. Ако Блискиот исток пламне, во голема мера може да предизвика каскадни верижни реакции кои што ќе предизвикаат, пред сè, економски, а потоа може и друг тип на кризни состојби од кои светот може да отиде во еден вртлог или да не кажеме, да отидеме по ѓаволите“, вели Хаџи-Јанев.