Израелската армија изврши воздушни напади врз селото Кфар Хата во јужен Либан, соопшти либанската државна новинска агенција.

Нападите следуваа откако израелската војска упати предупредување до жителите да се евакуираат, наведувајќи дека ќе бидат погодени објекти поврзани со милитантната група Хезболах.

Според либанските медиуми израелските воени авиони извеле повеќе од 10 напади врз целната област, при што биле предизвикани значителни материјални штети на објектите кои биле погодени.

Засега не се пријавени жртви. Претходно, Израел изврши напади и врз неколку локации во гувернатот Набатие на југот на земјата.

Либанската армија неодамна соопшти дека планот за разоружување на недржавните вооружени групи е во напредна фаза, но владата наведува дека континуираните израелски напади и присуството на израелски сили на неколку позиции во јужен Либан го отежнуваат процесот.

Израел, пак, тврди дека Хезболах продолжува брзо да се реорганизира и да се вооружува по конфликтот од крајот на 2024 година.