Комисија од министерството за правда денеска ќе ја проверува работата на Основниот суд Кавадарци каде претседател е судијата Лазар Нанев.  Министерот Лога пред неколку дена го разреши Нанев од претседател на Советот за координирање на информатичко-комуникациска технологија во правосудните органи (ИКТ), поради нарушен интегритет.

Комисијата ќе врши надзор на работата на кавадаречкиот Суд и на сите забелешки нотирани по анализата на материјалите за седница од Судски совет. Тимот од Министерството за правда ќе го испитува и АКМИС системот.

Лога информираше дека иницирал и постапка за изработување на нов правилник за функционирање на Советот на ИКТ, врз основа на кој, како што најави, ќе биде формиран и нов состав на ова тело. До Судскиот совет министерот доставил и допис за отворање на постапката за утврдување на одговорност за работата на претседателот на Основен суд Кавадарци, судијата Нанев.