Државната комисија за спречување корупција е изненадена од брзото носење на измените во кривичниот законик, кои вчера Собранието по скратена постапка, без широка расправа ги изгласа со 48 гласа, против беа 36 пратеници, и еден воздржан.
Од ДКСК укажуваат дека Кривичниот законик како еден од столбовите на правниот систем, треба да го штити функционирањето на правната држава.
Со донесувањето на измените и дополнувањата на овој закон во Собранието на Република Северна Македонија, и тоа со молскавична брзина, по скратена постапка и употреба на европското знаменце, односно на начин со кој не се дозволува широка јавна расправа, експерстка дебата ниту анализа на последиците што ќе ги предизвика ова законско решение, сериозно се загрозува правната сигурност во државата.
Државната комисија за спречување на корупцијата смета дека со интервенциите во членовите 353, 353в и 394 не се придонесува кон зајакната борба против корупцијата и организираниот криминал, напротив, се зголемува ризикот од политички пазарења и трговија со влијание, велат од Комисијата за спречување на корупцијата.
Борбата против корупцијата и натаму ќе остане само декларативна.
