Скопскиот кривичен суд потврди дека ги прифатиле предложените мерки за претпазливост за  сите 5 осомничени во истрагата за незаконски отпис на пченица и јачмен од државни стокови резерви. На осомничените им се одземени пасоши и им е определено редовно јавување во суд за време на истрагата која ја води скопското обвинителството.

Со истрагата се опфатени поранешниот министер за земјоделство Трајан Димковски, екс директорите на ЈП Агроберза и на Агенцијата за стокови резерви, вештак и раководител во Агенција за стокови резерви. Надлежните истражни органи наведоа дека е изготвен неточен документ со кој е направен отпис на 2 илјади тони жито од државните резерви во периодот меѓу 2019-та и 2021-ва година. Штетата на буџетот според истрагата е околу 780 илјади евра.

По отворената истрага за злоупотреба на службена положба, СДСМ реагираше бидејќи смета дека нивниот поранешен министер е приведен бидејќи јавно го критикуваше актуелниот министер Цветан Трипуновски за скандалот со ИПАРД програмата и запрените 130 милиони евра европска помош за земјоделците. ВМРО-ДПМНЕ им возврати дека штитат криминалци во сопствени редови.

Миомир Серафиновиќ