Израелскиот премиер Бенјамин Нетанјаху во саботата рече дека нема да потклекне пред меѓународниот притисок да дојде до спогодба пред воената експанзија на неговата земја во Рафа, велејќи дека „Оние кои сакаат да не спречат да дејствуваме во Рафа во основа ни велат – изгуби ја војната“.

По состанокот на неколку меѓународни дипломати на високо ниво во Минхен, каде што се разговараше за можноста за прекин на огнот во конфликтот во Газа, прес-службата на Нетанјаху објави снимка од премиерот што го отфрла ова, велејќи дека „нема да подлегне на меѓународните диктати во идното спогодување со Палестинците“

Израелскиот министер за одбрана во петокот рече дека Израел „темелно планира“ воена офанзива во градот Рафах во јужниот дел на Газа, сигнализирајќи ја решеноста да продолжи напред и покрај зголемената меѓународна загриженост за безбедноста на стотици илјади Палестинци кои бараат засолниште таму.

Американскиот претседател Џо Бајден го повика Израел да не ја спроведува операцијата без „кредибилен“ план за заштита на цивилите и наместо тоа да се фокусира на прекин на огнот, додека Египет рече дека операцијата може да ги загрози дипломатските односи меѓу земјите.

Многу други светски лидери објавија слични пораки на загриженост.

Се проценува дека 1,4 милиони Палестинци, повеќе од половина од населението на Газа, се сконцентрирани во областа, повеќето од нив се раселени поради борбите на друго место на територијата.

Стотици илјади живеат во големи шаторски кампови.

Палестинците и меѓународните хуманитарни агенции велат дека нема безбедно место каде да се оди, а Израел, исто така, изведува напади во областите каде што им кажа на цивилите да бараат засолниште, вклучувајќи го и Рафа.