Обвинителн акт поднесе ОЈО за лицето кое 64-годишната Ангелина Ангелова од Неготино  ја удри и  усмрти со товарно возило  за кое немал важечка дозвола и бил речиси целосно слеп. Лицето ќе се гони за кривично дело „Тешки дела против безбедноста на луѓето и имотот во сообраќајот“ по член 300 став 2 во врска со член 297 став 1 од Кривичниот законик.

Според обвинението, несреќата се случила на 3 декември 2024 година, на регионалниот пат Р1103, на делницата Пепелиште – Неготино, кај местото викано „Лаки“. Обвинетиот управувал товарно возило „цитроен џампер“ со велешки таблички иако во тој момент не поседувал важечка возачка дозвола, таа му била со истечен рок.

Како што информира Обвинителството, обвинетиот „не обрнал внимание на пешаците кои се движеле покрај коловозот“ и со страничниот ретровизор удрил во главата на Ангелина Ангелова. Ударот бил фатален, жената паднала од патот, а добиените повреди, скршен череп, пршлени и повеќе коски, биле смртоносни.

Во соопштението се наведува и дека „на оштетената ѝ се констатирани одредени пропусти, бидејќи имала можност визуелно да го забележи возилото и да се отстрани“, но тие се оценети како секундарни.

Во истрагата е откритието и дека обвинетиот имал попреченост, слепило со 99% намалена видна функција, за што примал инвалидска пензија и додаток. И покрај тоа, тој управувал со возило, а во текот на истражната постапка успеал дури и да ја продолжи возачката дозвола.

„Постапуваме по сите индиции што укажуваат на можна злоупотреба на документација и системски пропусти. Побаравме од ОВР Неготино да ги провери условите под кои обвинетиот добил возачка дозвола и инвалидска пензија“, изјавија од Основното јавно обвинителство Кавадарци.

Оваа несреќа отвори прашања за контролата при издавање на возачки дозволи, особено кај лица со сериозни здравствени пречки.