Од идната сабота започнува полагањето на екстерните испити од матурата за повеќе од 14.500 средношколци во државата. Годинава, согласно измените во Законот за средното образование, учениците ќе полагаат три вида матурски испити – државна матура, државна стручна матура и државна уметничка матура.

Според податоците на Државниот испитен центар, од вкупно 14.587 пријавени ученици, 12.184 ќе полагаат државна матура, 2.276 државна стручна матура, а 127 државна уметничка матура.

Најголем дел од кандидатите се пријавени за тест по англиски јазик, додека помал број ќе полагаат математика, историја или други странски јазици.

Изборниот екстерен предмет ќе се полага на 6 јуни, а задолжителниот испит по мајчин јазик и литература е закажан за 11 и 12 јуни.

Од Државниот испитен центар информираат дека се преземени сите мерки за фер и безбедно полагање, а за организацијата ќе бидат ангажирани околу 2.500 тестатори и 200 набљудувачи.