Папата Фрањо развил пневмонија во двете белодробни крила и неговата состојба останува сложена, објави Ватикан.

Осумдесет и осумгодишниот поглавар на Римокатоличката црква страда од респираторна инфекција повеќе од една недела и во петокот беше примен во римската болница „Џемели“.

„Скенирањата на градниот кош покажаа почеток на двојна пневмонија, за што е потребна дополнителна терапија со лекови. Клиничката состојба на папата останува сложена. И покрај тоа, тој е во добро расположение и го помина денот во читање, одмор и молење“, соопшти Ватикан.

Пред да биде примен во болница, папата имал симптоми на бронхитис, по што откажа појавување на неколку настани. Во неделата беа откажани сите негови јавни настани.

Папата е подложен на белодробни инфекции откако во младоста имал плеврит, поради што на 21 година му бил отстранет дел од белодробно крило. Откако стана папа во 2013, тој беше хоспитализиран неколкупати.