Портпаролот на Кремљ, Дмитриј Песков, во вторник изјави дека е остварен контакт меѓу Париз и Москва, „кој, доколку е пожелен и потребен, би можел брзо да воспостави дијалог на највисоко ниво“.

Во коментарите пред новинарите, Песков додаде „досега не сме добиле никакви индикации за оваа желба, иако ја забележавме изјавата на Макрон за потребата од воспоставување односи со Русија“.

Песков нагласи дека Русија „отсекогаш била поддржувач на одржувањето на дијалогот“.

„Одамна велевме дека намалувањето на нашите односи на нула е нелогично, контрапродуктивно и штетно“, додаде тој.

Во меѓувреме, францускиот претседател Емануел Макрон рече дека неодамнешните дипломатски контакти меѓу Париз и Москва донесоа „потврда дека Русија не сака мир во моментов. Но, главно, ги обновивме овие канали за дискусија на техничко ниво“, рече тој во интервју објавено во вторник од неколку европски весници.

„Сакам да го споделам ова со моите европски партнери и да имам добро организиран европски пристап“, додаде тој.

Б.С.