Хрватската влада оди на големо зголемување на платите на околу 270 највисоки државни функционери. Одлуката се очекува на денешната седница на владата која е во тек.

Како што објави index.hr, платите на премиерот Андреј Пленковиќ, на претседателот на државата Зоран Милановиќ и на претседателот на хрватскиот парламент, Горан Јандроковиќ ќе се зголемат за 2.500 евра. Зголемените износи треба да легнат на нивните сметки веќе во август, со исплатата на платата за месец јули.

Основицата за раст ќе биде 83,45 отсто, односно ќе изнесува 947 евра бруто наместо 516 евра, колку што беше досега. Основицата се множи со коефициентот, па така нето износот на платата на функционерите ќе се зголеми за повеќе од 60 проценти, а за највисоките државни функционери и 70 проценти.