Повеќе од 800 странски државјани го напуштија Појасот Газа преку граничниот премин Рафах, во текот на вчерашниот ден, јавија египетските власти. Ова е најголемиот број луѓе кои поминале низ Рафа во еден ден од почетокот на евакуацијата. Ова беше и прва евакуација на странски државјани од четвртокот, кога повеќе од 300 од нив ја напуштија Газа. Сепак, во Појасот остануваат заглавени околу 20 илјади цивили, јавија хуманитарните организации. Египет претходно соопшти дека ќе дозволи излез на 7.000 странци и луѓе со двојно државјанство.

Израелскиот премиер Бенјамин Нетанјаху рече дека е можен договор за ослободување на околу 240 израелски заложници, земени од Хамас за време на нападот на 7 октомври. Нетанјаху не даде детали, но рече дека едно нешто што може да изнуди договор е воениот притисок што израелските одбранбени сили го вршат врз Хамас. Тој ги отфрли се почестите повици за прекин на огнот, освен ако тоа не вклучува ослободување на сите заложници.